AESANek higiene-baldintza gehigarriak proposatu ditu zuzenean kontsumitzeko esne gordinarentzat

AESANek bere Batzorde Zientifikoari eskatu dio baloratzeko ea zuzenean azken kontsumitzaileari saltzen zaion esne gordinarekin lotutako arriskua kudeatzeko neurriak egokiak diren kontsumitzaileei babes-maila handia emateko. Era berean, eskatu du proposamenak egin ditzala elikagaien produkzioan eta merkaturatzean aplikatuko diren higiene-baldintza jakin batzuk arautu eta malgutuko dituen Errege Dekretuaren proiektuan sartzeko.

Batzorde Zientifikoak arriskuaren ebaluazio-txosten bat egin du, eta bertan ondorioztatzen du esne gordinaren kontsumoari dagokionez babes-maila handia ematen zaiela kontsumitzaileei, baldin eta neurri jakin batzuk betetzen badira (batez ere, kontsumitu aurretik hoztea eta irakitea). Horrez gain, gomendatu du etiketan ohar bat jartzea, adierazteko ezarritako neurriak bete ezean, esne gordina kontsumitzea arriskutsua izan daitekeela giza osasunarentzat, eta esne gordinarentzat 3 eguneko balio-bizitza ezartzea.

Hauek dira AESANen Batzorde Zientifikoak azken kontsumitzaileari zuzenean saltzeko esne gordinarekin lotuta proposatu dituen arriskua kudeatzeko neurriak:

1. Irizpide mikrobiologikoak: bat etorriz 852/2004 eta 853/2004 Erregelamenduekin (EE) eta esnearen sektoreko operadoreek bete behar dituzten kontrolei buruzko araudi nazionalarekin, hauek dira esne gordinari aplikatu beharreko arrisku mikrobiologikoak:

1. Esne gordina beti ontziratuta aurkeztu behar da azken kontsumitzaileari saltzeko. Ontziak bete ondoren, berehala itxiko dira, esnea kontaminatzea saihesten duen ixteko gailu baten bidez.
2. Esne gordina duten ontzietan argi eta garbi adierazi beharko da ontziratze-data, baita etiketako argibide hauek ere: “Termikoki tratatu gabeko esne gordina: irakin egin behar da kontsumitu aurretik”, “Hozkailuan gorde, 1 eta 4 ºC artean” eta “Ontzia ireki ondoren, 3 egunetan kontsumitu behar da”.
3. Kolektibo zaurgarriei elikagaiak banatzen dizkieten sukaldaritza-establezimenduek (ospitaleak, haur-eskolak, ikastetxeak edo adinekoen egoitzak) ezingo dute esne gordina erabili lehengai gisa.
4. Esnea ekoizten duten ustiategiek ezingo diote beren ustiategiko esne gordina zuzenean saldu azken kontsumitzaileei, ezta zuzenean azken kontsumitzailea hornitzen duten txikizkako saltokiei ere, aurreko 1-4 ataletan ezarritakoa bete ezean.

Esne gordinak hainbat arrisku mikrobiologiko ekar ditzake berekin; hortaz, ezarritako neurriak zorrotz bete ezean, esne gordina arriskutsua izan daiteke kontsumitzailearentzat. EFSAk eta AESANek 2015ean argitaratutako txosten zientifikoek agerian utzi zuten esne gordina kontsumitzea arriskutsua dela kontsumitzaileen osasunarentzat.

Oraingo ebaluazio honetan, AESANen Batzorde Zientifikoak patogenoen hazkuntzaren zinetikak baloratu ditu 4, 6 eta 7 ºC-tan, eta, Listeria monocytogenes erreferentziazko mikroorganismotzat hartuta, 3 eguneko balio-bizitza ezartzea gomendatu du.