Elikagai-gehigarri gisa erabilitako fosfatoen segurtasunaren ebaluazioa

EFSAren Elikadura Gehigarriei eta Aromei buruzko Taldeak fosfatoen segurtasuna ebaluatu du, eta ondorioztatu du ez dagoela kezkatzeko arrazoirik horien toxikotasunari eta kartzinogenizitateari dagokienez. Dena den, eginiko kalkuluen arabera, dieta osoaren bidez hartzen den guztizko fosfatoak ezarritako segurtasun-maila gainditzen du kasu batzuetan, eta, beraz, EFSAk gomendatu du elikagai-gehigarri gisa erabiltzen den fosfatoa erregula dadila.

Dietaren bidezko esposizioa kalkulatzeko, dietako iturri guztietatik datorren guztizko fosforo kantitatea hartu da kontuan, ez soilik elikagai-gehigarriei dagokiena. EFSAko adituen arabera, elikagai-gehigarrietatik datorren fosforoa (P) hartzen dugun fosforo guztiaren % 6 eta % 30 artekoa da.

Fosfatoekiko esposizioaren balioak tarte honetan daude: bularreko haurren kasuan, 251 mg P pertsonako eta eguneko; eta helduen kasuan, 1,625 mg P pertsonako eta eguneko. Esposizio altua (95 pertzentila), aldiz, hau da: haurtxoen kasuan, 311 mg P pertsonako eta eguneko, eta helduen kasuan, 2,728 mg P pertsonako eta eguneko.

EFSAren Taldeak adierazi duenez, fosfatoen (fosforo gisa adierazita) Eguneko Ingesta Onargarria  40 mg-koa da, gorputzaren kg eta egun bakoitzeko, eta ondorioztatu du ingestaren muga horrek mota guztietako biztanleak babesten dituela. Kalkulatutako esposizioak kontuan hartuta, egiaztatu da tarteko mailan Eguneko Ingesta Onargarria gainditu egin dezaketela haurtxoek eta haur txikiek, eta 95 pertzentilean haurtxoek, haurrek eta nerabeek.

Haurrentzako prestakinak hartzen dituzten 16 astetik beherako haurtxoen kasuan, EFSAren Taldeak ondorioztatu zuen eskuragarri dauden datuek ez dutela kezkarik eragiten elikagai horien segurtasunari dagokionez.

Bestetik, Taldeak ikusi zuen elikadura-osagarrien bidez hartzen diren fosfatuekiko esposizioak gainditu egiten duela proposatutako Eguneko Inkesta Onargarria. Horrenbestez, halako osagaiak egunero hartzen dituztenek giltzurrunetako disfuntzioa izateko arriskua dute.

EFSAko zientzialariek Europako Batzordeko eta estatu kideetako arriskuaren kudeatzaileei gomendatu diete erregulatzeko EBn elikagai-gehigarri gisa erabiltzen diren fosfatoak.