EFSAren azken irizpenaren arabera, elikagaien presio altuko prozesamendua (HPP, ingelesezko siglengatik) eraginkorra da mikroorganismo kaltegarriak suntsiarazteko, eta ez du elikagaien segurtasuneko arazo gehigarririk ekartzen beste tratamendu analogo batzuekin alderatuta.

Nabarmentzekoa da, gaur-gaurkoz, HPPko teknika horiek ez daudela berariaz araututa EBn, eta, beraz, alor horretako arrisku-kudeatzaileek irizpen hau hartuko dute oinarri erabakiak hartzeko

Prozesua honetan datza: presio altua aplikatzea denbora jakin batez. Ikusi da prozesu horren ondorioz zenbait elikagai-patogeno murrizten direla, zaporeari, testurari, itxurari eta balio nutrizionalei ia eragin gabe (Prozesu estandarra hauxe da: 400-600 MPa, 1,5-6 minutu).

Emaitza onak izan ditu zenbait lehengaitan (esnea, fruta-zukuak eta irabiatuak) erabiltzean, baina baita jada eraldatutako produktuetan ere (xerratan egositako haragizko produktuak eta kontsumitzeko prest dauden elikagaiak).

Oro har, prozesu estandar horrek pasteurizazioak baino eraginkortasun txikiagoa du. Hala ere, denborak eta presioak areagotuta (600 MPa, 6 minutu), pasteurizazioa bezain eraginkorra izan daiteke elikagaietako patogenoak desagerrarazteko (S. aureuserako izan ezik).

Horrekin guztiarekin, eta irizpenean azaldutako espezifikazio teknikoen arabera, teknika hori erabil daiteke Listeria monocytogenesa kontrolatzeko kontsumitzeko prest dauden elikagaietan, eta esne gordinaren pasteurizazio termikoaren alternatiba gisa.

Halaber, frogatu da HPPa beste agente patogeno batzuen mailak murrizteko eraginkorra ere badela (adibidez, Salmonella eta E. coli).

The efficacy and safety of high-pressure processing of food