Batzordeak arau berriak ezarri ditu elikagaietako artseniko-kopurua murrizteko. Beste urrats garrantzitsu bat da elikagaietan dauden substantzia kimikoekin lotutako minbizi-arriskua mugatu edo ezabatzeko Europako Planeko helburuak lortze aldera.

Erabaki hori elikagaietan dagoen artsenikoak osasun publikoarentzat duen arriskuaren azken ebaluazioan (EFSA, 2021) oinarritzen da, eta estatu kideei elikagaietako artseniko-kopurua zaintzeko eskatu ondoren hartu da erabakia.

EFSAren irizpenaren ondorioak

  • Adin-kategoria guztietan, honako hauek izan ziren artseniko inorganikoarekiko elikagaien bidezko esposizioaren faktore nagusiak: arroza, arrozez egindako produktuak, eta arroza eta edateko ura dituzten zerealez egindako produktuak.
  • Haurrentzako egokiak diren zenbait elikagai (besteak beste, bularreko haurrentzako eta haurtxoentzako zerealez egindako elikagaiak, haurrentzako gailetak, bizkotxoak eta cookieak, bularreko haurrentzako prestakinak, jarraipen‑prestakinak, bularreko haurrentzako eta haurtxoentzako erabilera mediko berezietarako elikagaiak, haurrentzako elikagaiak eta fruta-zukuak) artseniko inorganikoarekiko elikagaien bidezko esposizioaren faktore nagusiak ziren herritar-talde honetan.

Elikagaietako artseniko-kopuruaren gehieneko muga berriak

Elikagaietako artseniko-kopuruaren gehieneko mugak (2023)

Elikagaiak Gehieneko kopurua (mg/pisu freskoaren kg)
Zerealak eta zerealez egindako produktuak
Arroz landua (arroz leundua edo zuria), ez erdiegosia 0,15
Arroz erdiegosia eta arroz zuritua 0,25
Arroz-irina 0,25
Arroz-opiltxoak, arroz-olatak, arroz-gailetak, arroz-pastelak, arroz-malutak eta gosaritarako arroz harrotua 0,30
Bularreko haurrentzako eta haurtxoentzako elikagaiak egiteko arroza 0,10
Arrozez egindako edari ez alkoholdunak 0,030
Bularreko haurrentzako prestakinak, jarraipen-prestakinak, bularreko haurrentzako eta haurtxoentzako erabilera mediko berezietarako elikagaiak, haurtxoentzako prestakinak
Hautsean merkaturatuak 0,020
Likido merkaturatuak 0,010
Haurrentzako elikagaiak 0,020
Fruta-zukuak, fruta-zuku kontzentratu suspertua eta fruta-nektarrak 0,020
Gatza 0,50

Artsenikoarentzako gehieneko eduki berriak 2023ko martxoaren 26an jarriko dira indarrean.

Hala ere, indarrean dagoen legeriarekin bat aurretik merkaturatu diren elikagaiek merkatuan jarraitu ahal izango dute kontsumo lehenetsiaren datara edo iraungitze-datara bitartean.

Elikagaietako artseniko-kopuruaren gehieneko mailak 2015ean ezarri ziren EFSAren irizpenean (EFSA, 2014) oinarrituta. Irizpen horren arabera artseniko inorganikoak azaleko, maskuriko eta biriketako minbizia eragin dezake.