EFSAk eguneratu egin du EFSA PRIMo tresna. Produktu fitosanitarioen hondakin-arriskuak ebaluatzeko eredu deterministiko bat da, eta erreferentzia gisa erabiltzen da Europan, 396/2005 eta 1107/2009 Erregelamenduek ezartzen dituzten hondakinen gehieneko mailak ezartzeko eta berrikusteko.

Tresna hau EBk gaur egun adostutako arrisku-ebaluazioaren ikuspegiaren arabera diseinatu da, eta produktu fitosanitarioentzako arriskua ebaluatzeko metodologia estandarizatzea du helburu. Horrez gain, malgutasuna ematen du arriskua ebaluatzeko egoera desberdinak kalkulatzeko, eta, hala, ebaluazio horiek gardenagoak izan daitezen lortzen da. Era berean, tresnak legezko mugak ezartzeko eta aldatzeko orduan erabaki egokiak hartzeko behar diren xehetasun nabarmenenak ematen dizkie arriskuen kudeatzaileei.

Gainera, bertsio berri honek (hirugarrena) informazio osagarria ematen du; besteak beste, eguneko gehieneko ingesta teorikoa eta luzera begirako esposizio dietetikoa kalkulatzen ditu.

Halaber, egin berri diren elikadura-inkestetatik datozen elikadura-kontsumoari buruzko datu berriak ematen ditu PRIMok, eta funtzionalitate berriak ditu, erabiltzaileek berau erraz erabili dezaten informazio-teknologiak sakon ezagutu beharrik izan gabe. Bestalde, datu ekonomikoak ere sartzeko aukera ematen du, arriskuaren ebaluazioetan alderdi hau kontuan hartzeko.