Vibrio choleraerako irizpide mikrobiologikoak arrantza-produktuetan

Elikagaien Segurtasunaren eta Nutrizioaren Espainiako Agentziaren (AESAN) batzorde zientifikoak zientzia-irizpen bat argitaratu du. Bertan, Vibrio cholerae-ren arriskua ebaluatzen du arrantza-produktuetan eta kontrolerako irizpide mikrobiologikoak gomendatzen ditu, bai eta arriskua murrizteko neurriak ere.

Azken urteotan hauteman da Vibrio espezieen presentzia areagotu egin dela arrantzatik eratorritako produktuetan, besteak beste klima-aldaketa, nazioarteko merkataritza eta hautemateko eta diagnostikatzeko metodo berrien garapenaren ondorioz. Hortaz, beharrezkoa da kontrolerako gida eta estrategia eraginkorrak inplementatzea.

V. cholerae O1 eta O139 serotaldeak eta koleraren toxinarentzako kodifikatzen duen genea duten anduiak (ctx positiboak) arriskutsuak dira kontsumitzaileentzat, arrantzatik eratorritako eta kutsatutako produktuak ahoratzen direnean.

Espezie patogenoek eragindako elikadura-infekzioaren prebalentziari eta agerraldiei buruzko datu berrienek adierazten dute arriskua txikia dela, batez ere kutsadura-maila handiko elikagaiak noizean behin hartzen direnean edo elaborazio- eta biltegiratze-praktikak desegokiak direnean.

Bestalde, V. cholerae ez toxigenikoko serotaldeen presentzia areagotu dela hauteman da, ziurrenik klima-aldaketari lotutako ingurumen-faktore desberdinen ondorioz. Andui ez-toxigenikoen patogenotasuna oraindik ez da zehatz-mehatz definitu, eta ez dago elikadura-transmisioaren ondoriozko infekzioari buruzko ebidentzia solidorik.

Gaixotasunaren sintomatologia nabarmena da gizarteko talde kalteberenetan eta azkar transmititu egiten da; hortaz, AESANen batzorde zientifikoak V. cholerae O1 eta O139 eta bestelako andui ctx positiboentzako irizpide mikrobiologikoari eustea gomendatzen du; hots, arrantzako produktu izoztu gordin edo kontsumitzeko prest dauden arrantzako produktu egosietan 25 g-ko absentzia.

V. cholerae ez-toxigenikoen anduien kasuan, berriz, serotalde horien arriskua txikia denez populazio orokorrarentzat, ez dirudi irizpide mikrobiologikoak ezarri behar direnik oraingoz. Hala ere, produkzio- eta kontsumo-katean zehar higiene-jardunbide egokiei jarraitzea gomendatzen da.

Arrantzako produktu izoztu gordinen kasuan, garbitzeko eta izotzetan jartzeko faseek, izozte-prozesua aplikatzearekin batera, patogenoaren kontzentrazioa murriztu dezakete. Halaber, batzordeak ondorioztatu du produktuaren erdigunea 2 minutuz 70 ºC-an egosteko tratamenduek bermatzen dutela patogenoa kendu dela.

Kontsumitzeko prest dauden arrantzako produktu egosien kasuan, arrisku mikrobiologikoa egosteko tratamenduaren osteko kutsadurarekin lotzen da; izan ere, produktua egosi ondoren eta kontsumitu aurretik ez denez inaktibazio-tratamendurik egiten, gomendatzen da higiene-jardunbide egokiak eta Arriskuen eta Kontrol Puntu Kritikoen Analisiaren printzipioak aplikatzea elikagai horien ekoizpen-, banaketa- eta kontsumo-katean zehar.